Sa Likod ng Pangarap
Mary Jane Gotostos
Isang pangarap na inaasam-asam
Ay bunga ng hapdi ng isang paglisan
Paglisang nangyari sa kuko ng gabi
Paglisang dulot ay iisang pagkasawi.
Hindi niya nalaman, hindi ko sinabi
Sa sinapupunan ko'y may lumalaki
Bunga ng pag-ibig na ngayo'y tapos na
Dulot nitong aming sandaling ligaya.
Sinapupunan sa pagbukas ng pinto
Sumakit, humapdi, dugo ay tumulo
Hindi nya nakita ang sang munting luha
Isang paglalahad ng mundo kong giba.
Kaya sa gitna ng litong karagatan
Lahat ng sakit ay aking papalitan
Ng sang pangarap at mumunting hiling
Ng anak na hindi na magiging akin.
No comments:
Post a Comment